渣甸街一期一會

2023年4月28日

幾個月前落去同大佬Fred吹水，就知道佢地做到呢一日就要say goodbye。我係嚟左渣甸街開鋪先識佢地。每日10點望住佢地收鋪，就知道好快又到我們收鋪。唔會日日打招呼，但每次返工望落去見佢地著燈，我會覺得我唔孤單。

2019年我剛開鋪，我無咩客，同佢地你眼望我眼，到後來見到佢地每日人潮湧湧，睇住佢打低隔離左右，又再到後來望住人潮漸退，大家慢慢淡忘，要走既走，要留既留低繼續飲返其他廢水，到最後呢一個星期又有好多人嚟同佢地「瞻仰遺容」。企係鋪頭既落地玻璃窗前面，見證住呢四年只是輾轉眼間，好似一段縮時影片咁存取係我個腦到，記錄大家同自己既高低起伏以及變遷。

睇住當初一個個戰友相繼離場渣甸街，係呢個年頭做過生意既一行埋傾起唔洗幾句，就只會有一個想拍拍膊頭既心情，有咩心照不宣，離場是很無可奈何，又正確的選擇，仲死撐緊既只係好想陪大家留守到最後一刻，然後笑住講聲多謝同再見，勝過一句加油。

但對我而言，聽日開始唔會再見到佢地收鋪先，見唔到佢地個燈牌著燈；然後將來或會見到下一手進場，再掛上唔同既招牌。諗到呢到，雖然懷著祝福但我個心仍然好似無左一塊咁。2019-2023年間既渣甸街，係我記憶唔會改變，因為一切都已寫進歷史，有你有我有佢。昔日有樓上樓下，街頭街尾互相扶持互相鼓勵既鄰里經歷，對於第一次做生意既我而言，無疑係一段好美好！好美好！好美好既回憶。呢段回憶足以我即使面對挫敗仍然能夠講一聲「我無後悔過」。

好感謝我人生第一間店傻頭傻腦地選址在渣甸街，好感恩我遇上你哋。

我真係一啲都無後悔過。