闆娘的彈珠力學

搬左上嚟三樓話咁快就差唔多兩星期。
見到大家同我仍然一齊每日搵緊呢樣個樣放左係邊，呢種感覺好有趣。好似同好多人一齊搬家一樣。搵呢搵路，係因為大家都要適應。一個人適應無疑會感到孤單，但當一大班人一齊適應，感覺竟然變有趣。

以前闆娘比宜家更唔識同人相處。在無數次踫壁之後，係好耐之前，我立定心腸去學習，點樣係做自己同時唔傷害到人地，點樣唔迎合別人同時愛人如己，點樣保護自己同時保持開放真誠。呢個過程尤如不停將手上管子裡既彈珠保持平衡。你太用力唔得，你唔用力唔得；你太專注唔得，你放開手更加唔得。直到宜家每日都仍然觀察，仍然學習。

三人行 必有我師，每日係到都聽到唔同既問題。你拎出嚟講，我又拎出嚟問。其實我地每個人都係第一次經歷生命，都是生命入面既新手。但係到就發現，我既問題原來不是世界既第一次，有人經歷過第一次，甚至更多次。而你面對緊既，竟然又係我既第二次。然後我發現，中間粒彈珠愈大愈重，原來會更容易保持平衡。